يا أهالينا الكرام في دايرة مركز المنصورة ومحلة دمنة.. اسمعوا الأخبار الزينة!
دايماً متعودين إن النائب يظهر وقت الانتخابات وبعد ما ينجح “يا فكيك” ما نشوفلوش وش، لكن النهارده الكلام مختلف خالص!
النائب المحترم جمال الفار كسر القاعدة، ونازل بنفسه يلف على القرى والعزب، راجل بيشوف شغله على مية بيضا وسط ناسه وأهله،
وبيثبت إن الخدمة العامة تكليف مش تشريف.
جولة من القلب في “الناصرة” و”البقلية”
من كام يوم كده، شرفنا النائب في قرية “الناصرة”، قعد مع الأهالي قعدة مصطبة أصيلة، يسمع شكاويهم ومشاكلهم بنفسه، عين في عين،
من غير واسطة ولا سكرتارية.
والنهارده بقى، شد الرحال لقرية “البقلية” يتابع الشغل على الطبيعة.
وخلال الزيارة الجميلة دي، تفقد قطعة الأرض الخيرية اللي اتبرع بيها الراجل الأصيل الحاج/ حمادة الفار لأهل البقلية.
أرض خير هتتبني عليها مدرسة تنور عقول ولادنا، أو أي خدمات تانية الأهالي تتفق عليها وتشوفها مناسبة ليهم.. كتر ألف خيره وربنا
يجعله في ميزان حسناته يا رب.
شغل على التقيل وفتح ملفات مهمة
الزيارة ما كانتش بس سلامات وتحيات، دي كانت شغل بجد! النائب فتح الملفات اللي بتهم كل بيت في القرية، واتناقشوا في أهم الحاجات اللي شاغلة بال الناس، زي:
الوحدة الصحية اللي الناس محتاجاها تخدمهم وتداويهم.
خط المياه الرئيسي عشان شريان الحياة يوصل لكل بيت.
الغاز الطبيعي عشان نريح أهالينا من شيلة الأنابيب وتعبها.
أرض الأوقاف وتفاصيلها.
وفي مشاكل تانية كتير ومهمة اتطرحت، هتشوفوها وتسمعوها بنفسكم في الفيديو اللي هنرفعه ليكم قريب إن شاء الله.
النائب المحترم أخد العهد على نفسه، ووعد قدام الكل إنه هياخد هموم وطلبات الناس دي كلها ويحطها على مكاتب السادة الوزراء والمسئولين عشان يجيبلهم حقهم، ومش هيرتاح غير لما تتحل.
كلمة حق تتقال: إحنا حقيقي ما شوفناش قبل كده نائب سابق ينزل يلف على القرى ويتابع الشكاوى على الطبيعة بعد ما الهوجة والانتخابات تخلص. خطوة تتحسب له، وربنا يعينه ويقدره على خدمة دايرته وأهل بلده، ودايماً عامرين بالناس المخلصة!
